♥ ♥ ♥ ♥ ♥ ♥ ♥
باگـيـں وطن
♥ ♥ ♥ ♥ ♥ ♥ ♥
حسرت بلوچ ـ مشکئے

ماهتاک بلوچی جولائی 1956
♥ ♥ ♥ ♥ ♥ ♥ ♥
او وطن! باگيں بلوچستان شيرانی ديار
شان و پر شوکت تئی پر هيبتيں کوه و حصار
په بلوچانی دلءَ کوٹ و کلات­انت آسنيں
محکميں بند و تئی ماتکوه رنگ­رنگيں تلار
تو په شاگيں گوانزگاں رودينت ما را کت مزن
ما چو سوليں پُـسگءَ هر خدمتءَ پر تو تيار
تو مبو غمگين او مادر مجن ما را شگان
ما پما روچاں زرن دشمن ببنت گوں ما دچار
ما چو شيرءَ گريشهءِ پر تئی تلارانی سرا
بيا هما روچاں وتی بچانی کرداراں بچار
او وطن! باگيں بلوچستان شيرانی ديار
په شمئے گوانکءَ رسنت شيرانی سرمستيں سوار
او وطن! هر وخت ترا پُـلّـيں زهيری يات کنن
دانکه است­انت مئے گورءَ، اے قالب و روح و بدن
سوزناکيں بلبلی آوازءَ پر تئیءَ وطن
چو که بشامی جـڑ و گرند و گروکی سرگرن
کيلگ و بند تئی گيابيں، تـلّـی سر سبزيں بهار
ما وتش زانن که پر ما است چه رنگيں گوهرن
سبز و زيبائيں زر و وشکوش سد گنجيں تياب
مئے په دوريں هلکواں نام و توارش برتگن
او وطن! تئی کوچگ و دشت و بهارانی تها
شات و هندانءَ تئی دشتءَ په سيلے رفتگن
او وطن! مئے مادر و مهرانی دلسوزيں وطن
په دلءِ هوناں کته رنگين تئی دشت و چمن
او وطن! تئی کوچگءَ سول و چناری رستگن
ما تئی باگيں گلستانءَ وتی دل بستگن
او وطن! ما پر تئی لج و ميارانی سرا
تو وت زان­ئے که چنت بر اچ سرءَ سرگوستگن
تئی اے شيريں بچ جنگانی يل و نام آوريں
گريوگی اچ مئے په براتاں دو گستا سـستگن
تئی يلانی بيم و هکّـل، نهيب و هيبتءَ مدام
زهم جنيں مردانی سر هـمءَ کوه اچ زمينءَ کستگن
کس نه­دنت گواهی به اے تاريخ دنياءِ تها
جنگءِ ميدان و پـڑءَ ميريں بلوچاں جستگن
او بلوچ حسـرت وتی گالاں په شـرّیءَ کتار
ما گلستانءَ دگه رنگے مروچی ديستگن

♥ ♥ ♥ ♥ ♥ ♥ ♥
http://www.zrombesh.org/Balochi/Poet-Hasrat-Zrombesh[1].htm